ភ្នំពេញ៖ គណបក្សប្រជាជនកម្ពុជាបានរៀបចំជួបជុំរចនាសម្ព័ន្ធគណៈចលនាមហាជនទូទាំងប្រទេសនៅថ្ងៃទី៣០ ខែមេសានេះដើម្បីទទួលយកធាតុចូលសំខាន់ៗនៃស្ថានភាពនយោបាយ សេដ្ឋកិច្ច សង្គម សម្រាប់ជាមូលដ្ឋានក្នុងការអនុវត្តការងារសមរភូមិសតិអារម្មណ៍ឆ្ពោះទៅកាន់ការបោះឆ្នោតជ្រើសតាំងតំណាងរាស្រ្ត អាណត្តិទី៧ ខាងមុខ។
សមាជិកគណៈកម្មាធិការកណ្ដាលបក្សប្រជាជនលោក ហ៊ុន ម៉ានី បានសរសេរលើហ្វេសបុកផេករបស់លោកនៅថ្ងៃ៣០ ខែមេសានេះថា នេះគឺជារបៀបរបបធ្វើការងាររបស់គណបក្សប្រជាជនកម្ពុជា ដែលបានចាត់ទុកការងារចលនាមហាជនជាការងារដ៏មានសារៈសំខាន់ ដែលជាសសរស្តម្ភដ៏មានសារៈសំខាន់ក្នុងការធានាប្រៀបឈ្នះរបស់គណបក្សនៅក្នុងការបោះឆ្នោត។
លោកបានឲ្យដឹងថា គណបក្សប្រជាជនកម្ពុជាតែងតែយកចិត្តទុកដល់ការបំពាក់បំប៉នសមត្ថភាពរបស់មន្រ្តីគណបក្សជាប្រចាំដើម្បីបំពេញបេសកកម្មជូនគណបក្សបានប្រកបដោយប្រសិទ្ធភាព ក្នុងស្មារតីទទួលខុសត្រូវខ្ពស់។
បើតាមលោក ហ៊ុន ម៉ានី ភាពជោគជ័យរបស់គណបក្ស កើតចេញពីកិច្ចខិតខំប្រឹងប្រែង និងការលះបង់របស់សមាជិកសមាជិកាម្នាក់ៗ។ ក្នុងនាមជាមន្រ្តីគណបក្ស យើងម្នាក់ៗត្រូវខិតខំត្រង់ត្រាប់ស្តាប់ និងកត់ត្រានូវរាល់បទបង្ហាញនានា និងអនុសាសន៍ដែលអាចយកទៅប្រើប្រាស់នៅតាមមូលដ្ឋានរបស់ខ្លួន៕
